Í Steikjandi hita

Við sem búum í norður hluta Virginíu og á Washington D.C. svæðinu erum vön stilltu og fallegu vori og hitinn fer yfirleitt ekki yfir 35°C fyrr en seint í júlí. Ekki aldeilis í ár. Þau 18 ár sem ég hef verið hérna man ég ekki eftir eins stormasömu vori og eins mörgum hvirfilbyls viðvörunum  eins og í ár.  Þessar viðvaranir sem voru áður fyrr einu sinni eða tvisvar yfir sumartímann liggur við að séu orðnar að vikulegum viðburði.

Sl miðvikudag beið ég í bílnum mínum með góða bók á meðan Erik minn var í skylmingum. Ég sá að dökk ský sigldu mjög hratt inn og var að spá í hvort ég ætti að fara inn eða ekki.  Úfin skýin gerðu himininn svo dimman að dagsbirtan varð að rökkri.  Rétt í því að Andrea mín hringdi í mig með nýjar viðvaranir gerði mikið hvassviðri og regnið slóst um að berja á bílinn minn. 'Eg ákvað að það yrði sennilega ekkert gaman að sitja í fljúgandi bíl ef hann tækist á loft svo ég hentist inn. Veðrið gekk yfir á hálftíma eða svo og í þetta skipti voru engar stór skemmdir nema póstkassar fuku út í veður og vind og tré brotnuðu eða hreinlega gengu upp úr votri jörðinni með rótum og öllu. Maí mánuður var einn blautasti maí mánuður síðan mælingar hófust.  Eins fauk hreiður úr einu trénu og ungarnir skullu í gangstéttina og ég þarf ekki að segja afleiðingarnar af því.  Hluti af bænum varð rafmagnslaus vegna þess að rafmagnslínur slitnuðu (furðulegt að Ameríkanar skuli ekki reyna að grafa þessar rafmagnslínur niður) og fólk hefur setið rafmagnslaust og án loftkælingar.

Í gær mældist hitinn 36°C sama sagan í dag og á morgun á hitinn að fara í 38° svo þegar rakinn í loftinu er settur inn í dæmið erum við að tala um hita vel yfir 40°C. Þetta er skelfilegt fyrir gamla fólkið sem oft hefur ekki efni á að halda loft kælingunni gangandi. 'A miðvikudaginn á hitinn að "detta" í 33° en spáin segir að það er ekki fyrr en 17 júní að búist sé við að hitastigið eigi að fara niður fyrir 30°, nákvæmlega 29°. Þetta virðist ætla að verða heldur heitt sumar framundan.